|
In memoriam Ірина Скіба
У час здаваня новинкы у редакцію прийшла потрясувуча вість: Ірина Скіба, сотрудник Вседержавного Русинського Самосправованя, незабываєма колеґыня, незамінимый член нашуй сполности, по куртуй и тяжкуй, з великым терпінём перенесенуй хворотї 4. новембра с. р. вернула свою душу назад Создателёви.
Ірина Скіба родилася 1958. рока у Береґсасї. Кончила Мукачовську середню школу № 1, а потому пак дустала діплому у Львовськум політехнічнум інстітутї. Од 1998. рока жыла у Мадярщинї, и од тогды была активным дїятелём отцюзнянуй русинськуй сполности. Од 2001. рока она сповняла завданя секретаря у Столичнум Русинськум Меншыновум Самосправованю, зучастнёвала ся в орґанізації и веденю акцій русинськуй сполности. Од 2003. рока руководила секретаріатом Вседержавного Русинського Самосправованя, а од 2012. рока робила замістителём діректора Бібліотекы Русинув Мадярщины. У ї повинности входили сістематизація и каталоґованя истных и новых русинськых вудань, котрі у великуй кулькости поступали у бібліотеку.
Имня Ірины Скібы мож видїти у імпресумі многых русинськых вудань, она з самого зачатку основаня „Русинського Світа” наберала про йсе періодичноє вуданя статї на русинськум языкови. Старанёви и пунктуалности Ірины маєме дяковати за пудготовку русинськоязычных текстув умілськых албомув Атаназа Фединця, Івана Манайла и умілцюв фамілії Манайло, а также Календаря-Алманаха. Ги соредактор она зучастнила ся у вуданю книгы „Рецепты русинськых ґаздынь Мадярщины", русинськых учебникув, Мадярсько-русинського и Русинсько-мадярського словарюв.
„Круг повинностюв” Ірины Скібы быв дуже шырокый: многі рокы она исповняла завданя веденя касы ВРС, была все привітна, з добров дяков и пунктуално вела дїла депутатув и робутникув ВРС, была гостювлива ґаздыня на многых русинськых сятох и акціёх. Дякувучы своюй совістности и старателности Ірина стала надїйным сотрудником у секретатіатї ВРС, своёв працов помагала у роботї веденя и самосправованя в цїлови.
2013. рока Собур ВРС Преміёв Антонія Годинкы подяковав Іринї Скібі за ї дїяня.
Хыбіти буде нам Іринина світла, скромна, усе готова помочи, привітлива особа!
Во блаженом успенії блаженый покуй подаждь Господи усопшуй рабі твоєй Іринї и сотвори єй вічную памнять!
|
