Országos Ruszin Önkormányzat - Вседержавноє Русинськоє Самосправованя

Декларація зо сяточного голошеня кодіфікації мадярського варіанта

русинського літературного языка

            Єднов из майфундаменталных потребностюв каждуй модернуй людськуй сполности є хоснованя у ї каждоденнум жывотї літературного (стандартізованого) языка. Такого языка, котрый буде скапчовати носителюв окремых языковых діалектув: комловшського и мучонського у днешнюй Мадярщинї з пудкарпатськыма, буде про каждого похопителным и доступным, на котрум будуть ся ушыткі учити у націоналнуй школї, хосновати го у дїловуй сфері и масмедіёх.

Лем по падови комуністичных режімув у Централнуй Европі на кунцёви минулого столїтя наш народ дустав можность быти рувноправным меже иншыма народами. Русины дустали можность реалізовати свої націоналнї інтересы такой у вшыткых сферох сосполного жывота у керетох державного пудпорованя. 

Днесь з радостёв констатуєме, же мы, Русины, вєдно з мадярськым народом и другыма націоналностями нашуй державы Мадярщины, котру за давнёв традіціёв тримлеме Отцюзнинов-матірёв, будуєме нашу сполну будучность. Успішно фунґувуть наші націоналнї самосправованя, цівілнї общества, окремі културнї інстітуції. Мы маєме можность выдавати властнї масмедіа, учебникы и словарі про нашых школашув, научну літературу, товмачити на родный язык важнї державнї документы и голошеня и т. п. Ипен сеся сосполна практіка за послїднї деценії рокув привела нас раз до похопленя потребности хосновати окремый языковый стандарт, а по рокох выдаваня нашых масмедій, школных учебникув, словарюв и, наконець, подля ушыткуй сюй языковуй практикы  ̶ стандартизовати властну ґраматику  ̶  правила русинського писаня и выговорёваня.

Прийшов час, жебы днесь, 11. новембра, у сюм параднум каштілёви у притомности представителюв мадярського уряда, депутатув русинськых націоналных самосправовань, членув нашых цівілных орґанізацій, Русинув з ушыткых кунцюв нашуй державы, нашых дорогых гостюв  ̶  загатарных братув-Русинув  ̶  торжественно голосити за кодіфікацію властного варіанта русинського літературного языка про Русинув Мадярщины!

Будапешт, каштіль „Штефаніяˮ, 11. новембра 2023. рока

Торжествена декларація кодіфікованя мадярського варіанта русинського літературного языка

11. новембра 2023. рока узалї ґровфа Мигаля Естергазія каштеля „Штефанія”при притомности офіціалных особ Др. Чабы Латорцаі, замістителя міністера, парламентського держсекретаря, Віры Ґіріц, посланика Русинув у парламентї Мадярщины, Віктора Крамаренко, предсїдателя Вседержавного Русинського Самосправованя, Др. Степана Лявинця, предсїдателя Світовуй Ради Русинув и представникув и членув русинськых самосправовань Мадярщины, Русинох из Мадярщины, Польщы, Румынії, Сербії, Словакії и Украины торжествену декларацію кодіфікованя мадярського варіанта русинського літературного языка пудписали Др. Михаил Капраль, діректор Русинського научного інстітута имети Антонія Годинкы, Віра Ґіріц, посланик Русинув у парламентї Мадярщины, Віктор Крамаренко, предсїдатель Вседержавного Русинського Самосправованя и предсїдатель Світового конґреса Русинув, Степан Лявинец. Текст декларації на другуй сторонцї могли пудписати и притомнї при выголошеню кодіфікації.